Spjallbekkir: Byggjum upp samfélag

Spjallbekki er að finna víða um heim og er ætlað að hvetja til félagslegra samskipta og draga úr einmanaleika. Spjallbekkir hafa nú kjölfar Viku einamnaleikans 2025 verið settir upp á þó nokkrum stöðum. (sjá hér að neðan)

Þeir eru merktir, til að gefa til kynna að sá sem situr þar er opinn fyrir samtali. Spjallbekkir skapa þannig vinalegt rými fyrir ókunnuga til að tengjast. Markmið þessara bekkja er að ýta undir samfélagskennd og draga úr einmanaleika og félagslegri einangrun með því að hvetja til lauslegra samræðna.

Spjallbekkir eru hvatning um að nýta alla bekki í gott spjall.

Hafðu samband við okkur á vikaeinmanaleikans@kvenfelag.is ef þú vilt setja upp spjallbekk í þínu bæjarfélagi.

Hvernig þeir virka:

Bekkirnir eru sérstaklega merktir sem gefur til kynna að sá sem situr þar sé fús til að spjalla eða opinn fyrir samtali. Hér getur þú vistað niður pdf skjali. Þú getur svo plastað það eða sett í plastumslag og fest á bekk í þínu nágrenni.
Spjallbekkir eru staðsettir á opinberum stöðum eins og í almenningsgörðum, við gönguleiðir, í verslunarmiðstöðvum og samfélagsmiðstöðvum, sem gerir þá auðveldlega aðgengilega fyrir vegfarendur. Sjá hér að neðan staðsetningu á þeim Spjallbekkjum sem hafa nú verið settir upp.
Merkingarnar hvetja fólk til að hefja samtöl, sem eflir tengsl og samfélagskennd. Þeim er ætlað að vera aðgengilegir öllum, óháð aldri eða aðstæðum, og bjóða þannig upp á lágan þröskuld til samskipta.

Ávinningur:

Spjallbekkir minna okkur á mikilvægi mannlegra samskipta og sýna að stundum er smá hvatning allt sem þarf til að hefja spjall.
Þeir hjálpa til við að skapa tengdara og vinalegra umhverfi með því að auðvelda samtöl milli ókunnugra.
Að tengjast öðrum með léttu spjalli getur bætt skap, dregið úr streitu og aukið almenna vellíðan.

Smelltu hér til að vista niður pdf skjali, til að nota sem merkingu á þínum Spjallbekk. Þú getur svo plastað það eða sett í plastumslag og fest á bekk í þínu nágrenni.

Sækja PDF útgáfu

Sækja PDF útgáfu (fyrir prentsmiðjur)

Spjallbekkur í Reykjavík

Reykjavíkurborg og Vika einmanaleikans voru í samstarfi við að setja upp appelsínugulan Spjallbekk í Laugardalnum. Hann er staðsettur við innganginn við Grasagarðinn.

Steinunn Ása Þorvaldsdóttir, starfsmaður á mannréttindaskrifstofu Reykjavíkurborgar var viðstödd þegar spjallbekknum var komið fyrir 7. október 2025.

Hér má horfa á frétta innslag frá Rúv um appelsínugula Spjallbekkinn, Haukur Holm fréttamaður ræddi við Steinunni Ásu og Hörpu Þorsteinsdóttur, verkefnastjóra lýðheilsu hjá Reykjavíkurborg

Spjallbekkur í Grindavík

Kvenfélag Grindavíkur afhenti Grindavíkurbæ Spjallbekk í tilefni af Viku einmanaleikans. Afhendingin fór fram á viðburði kvenfélagsins 8. október 2025 í menningarmiðstöðinni Kvikunni, sem er táknrænt fyrir þann tilgang sem bekknum er ætlað að þjóna – að ræða saman og efla tengsl og byggja upp samfélagskennd.

Sjá nánar hér.

Sjá frétt á vef Vikurfrétta í desember 2025. Spjallbekkurinn er þétt setinn í Kvikunni í Grindavík

Það er Málmsteypan Hella sem framleiddi þennan bekk og merkti.

Spjallbekkur í Mosfellsbæ

Mosfellsbær stökk á hugmyndina um appelsínugulan Spjallbekk og voru snögg að græja bekk. Hann var vígður 9. október 2025 og stendur við Bjarkarholt, nálægt Hlín blómabúð.

Spjallbekknum er ætlað að efla tengsl milli fólks, draga úr einmanaleika og styrkja samfélagsandann í bænum.

Spjallbekkur í Hafnarfirði

Hafnarfjarðarbær lét útbúa appelsínugulan Spjallbekk í tilefni Viku einmanaleikans. Spjallbekkurinn í Hafnarfirði er staðsettur við Fríkirkjuna í Hafnarfirði og var vígður 13. október 2025.

Sjá frétt á vef Fríkirkjunnar

Spjallbekkur á Selfossi

Kvenfélag Selfoss lét útbúa Spjallbekk í nóvember 2025 og gaf bænum sínum.

Þær hvetja alla til að gefa sér tíma til að setjast niður og spjalla um lífið og tilveruna og gefa sér tíma til að kynnast lífi annarra í samfélaginu.

Bekkurinn er núna fyrir utan Selið fram í desember en svo verður hann formlega afhentur og færður í Tryggvagarð.

Spjallbekkur í Reykjanesbæ

Kvenfélag Keflavíkur færði Reykjanesbæ appelsínugulan spjallbekk í desember 2025 sem nú prýðir Skrúðgarðinn í Keflavík. Bekkurinn hvetur okkur öll til að rjúfa einsemd, efla tengsl og taka samtalið.

„Spjallbekkirnir eru tákn um hlýju og opnar dyr, og hvetja til þess að við setjumst niður, spjöllum saman og gefum okkur tíma fyrir hvort annað. Komdu við í Skrúðgarðinum og taktu spjallið, það getur bjargað deginum hjá einhverjum. “ segir í tilkynningu.

Sjá frétt á vef Vikurfrétta

Spjallbekkur á Strandgötu á Skagaströnd

Í febrúar 2026 var settur „Spjallbekkur“ við vinsæla gönguleið fyrir Víkina.

Spjallbekkjum er ætlað að hvetja til félagslegra samskipta og skapa tækifæri fyrir fólk til að setjast niður og eiga samtal við aðra.

Bekkurinn er merktur sérstaklega til að gefa til kynna að sá sem situr þar sé opinn fyrir samtali. Markmiðið er að skapa vinalegt rými þar sem ókunnugir geta tengst á einfaldan og óformlegan hátt. Með þessu er leitast við að ýta undir samfélagskennd og draga úr einmanaleika og félagslegri einangrun.

Öllum er velkomið að setjast á spjallbekkinn – hvort sem er til að hvílast, njóta umhverfisins eða eiga góða stund í samræðum við aðra.

Sjá frétt á vef Skagastrandar

Við óskum samfélaginu á Skagaströnd til hamingju með Spjallbekkinn.